الرئيسية / علوم و تكنولوجيا / طلب رفع اليد عن السكن الإقتصادي

طلب رفع اليد عن السكن الإقتصادي

طلب رفع اليد عن السكن الإجتماعي

طلب رفع اليد عن السكن الإقتصادي

 

أول مشكل كيواجه الأسر المغربية هو السكن و من بين الحلول لي كايلقاو هو السكن الإقتصادي يعني قبر كيبدا من 50 متر وحتى ل 80 متر گاع إلا كنتي مرضي الوالدين…

الشقة كتشريها ب 25 مليون كاش ، طبعا كدير كريدي على مدة 25 عام. حيت كن كان فجيبك هاد المبلغ لن تلقي بنفسك إلى التهلكة..

كريدي على مدة 25 عام جات بشي 1300 درهم للشهر ، لا عندك مع الحساب غتلقا بلي البانكة غتربح معاك تقريبا النص بالنص و فاش غيسالي الكريدي (لا بقيتي بالحياة طبعا ) غتلقا بلي خلصتي حوالي 50 مليون .. المهم هادشي ماشي موضوعنا لأن كلشي عارفو…

لكن ما تجهله أخي المواطن و بزاف ديال الناس غالطين حتى كيتصدمو هو أن الشقة وخا شريتيها راها ماشي ملكك راه فملك الدولة أو البانكة, ماشي من حقك تبيعها تادوز واحد المدة…

كيفاش….

الشقة فاش كاتبنا من طرف المقاولة كتكون ساوية (إفتراضيا) 29 مليون (الثمن+الضريبة) وبما انها موجهة للطبقة الهشة الدولة كتدخل و كتخلص عليك 4 دالمليون ديال الضريبة ، يعني نتا كتشري الشقة بلا ضريبة و كتباع ليك ب25 مليون ( هدا داخل فبرنامج الحكومة لدعم الفئة الهشة للحصول على سكن زعما… ) .

لكن ماكتخلص عليك داكشي غا هكاك لله فسبيل الله ، الدولة مطورة ، كتفرض عليك أن البرطمة لي شريتي و خلصت عليك الضريبة ديالها خصك ضروري تسكن فيها لمدة 4 سنوات (ابتداءا من نهار شريتيها ) ،و تكون سكن رئيسي ديالك ماشي ساكن فبلاصة اخرى، عاد من بعد 4 سنوات كتولي ملك ديالك وممكن بيعها.. ولا ماسكنتيش فيها رجع لينا 4 دالمليون ديالها لي من حق الدولة ترجع المساهمة ديالها باش عاوناتك.

و فعلا من نهار كتشري البرطمة وفاش كدوز 4 سنوات، الدولة راها مقيداك و خصك تمشي عندها ولا مامشيتيش عندها مور 4 سنوات غاتزيد عليك ضرائب أخرين..

إذن فاش كتسالي 4 سنوات باش شريتي البرطمة ، ملزوم عليك تمشي لمديرية الضرائب و كدفع ليهم واحد الطلب اسمه ” طلب رفع اليد عن السكن الإقتصادي ” ، يعني نتا كتقول للدولة بغيت الدار تولي ملك ديالي مستقل بيها هزي يدك عليها ، الدولة كتقولك مرحبا جيب لينا هاد الوثائق و بصحتك الدار..

 

هاد الوثائق ديال طلب رفع اليد عن السكن الإقتصادي هما لي طالع عليهم الفيلم :

 

  •  أول حاجة: كتدي ليهم وراق الماء و الضوء لطيلة 4 سنوات من نهار سكنتي باش يتأكدو بلي الكونتور كان داير ماشي كنتي غير سادها..

..

  •  ثانيا : خصك تدي ليهم لاكارط فيها العنوان ديال ديك الشقة يعني خصك شهادة السكنى ولا ماكنتيش ساكن تما ماغتدهاش..

 

  •  ثالثا : كتدي ليهم ورقة بلي كنتي كتخلص الضرائب ديال النظافة و الخدمات ديال الجماعة لمدة 4 سنوات و بسميتك..

هاد الإجراءات كلها غير باش تتبث للدولة أن الدار كنتي ساكن فيها…

هاد الوراق كيبانو ليك عاديين ولكن إلا ماكنتيش ساكن فيها غا بلا ماتحلم تجمعهم ولا تشدهم و بالتالي كتقولك الدولة أرا لي رزقي لي خلصت عليك، لي هي 4 دالمليون زائد شي مصاريف و كل مرة تعطلتي عام ولا عامين من بعد 4 سنوات ، كيتزاد شي حوايج كتوصل تال 7 دالمليون…

وشحال من واحد غالط فهاد شي حتى نهار كيدوز 4 سنوات و الصرف، و يتصدم بلي الضريبة كتسالو 7 دالمليون كلما تعطلتي كتزاد عليك و الدار عمرك تبيعها لأنها مازال فملك الدولة..

يعني سكن ولا خلصنا فالضريبة ديالنا والدولة دايرة حملة دابا باش تعمر الخزينة ديالها، إذن بلا ماتفكر تكريها و تسكن فبلاصة أخرى ، حتى تولي ديالك..

عندك شي تصحيح ولا شي إضافة كتبها فالتعليق باش نستافدو كاملين..

وماتنساش إلى عجبك الموضوع ماتخليهش يحبس عندك وبارطاجيه باش تعم الفائدة..

شاركها

شاهد أيضاً

أثمنة رخصة السياقة بالمغرب 2024 مع وثائق وشروط الحصول عليها

أثمنة رخصة السياقة بالمغرب 2024 مع وثائق وشروط الحصول عليها

  أثمنة رخصة السياقة بالمغرب 2024 مع وثائق وشروط الحصول عليها: ثمن الحصول على رخصة ...